O alumnado de 5º e 6º de Educación Primaria participou recentemente nunha actividade práctica dentro da área de Educación Física centrada no coñecemento básico dos primeiros auxilios, un dos criterios de avaliación incluídos no temario da materia.
Durante as sesións, o alumnado tivo a oportunidade de aprender e practicar diferentes actuacións fundamentais en situacións de emerxencia. Entre os contidos traballados destacan as manobras de atragoamento, a posición lateral de seguridade, o procedemento de reanimación cardiopulmonar (RCP) e o coñecemento e manexo básico dun desfibrilador externo semiautomático (DESA).
A través de actividades prácticas e simulacións, os nenos e nenas puideron experimentar como actuar ante situacións reais, comprendendo a importancia de manter a calma, pedir axuda e aplicar correctamente as técnicas de primeiros auxilios. Esta formación contribúe a fomentar hábitos de prevención e a desenvolver competencias que poden resultar fundamentais para salvar vidas no futuro.
Con iniciativas como esta, o centro continúa apostando por unha educación integral, na que o alumnado non só desenvolve habilidades motrices, senón tamén coñecementos e valores que favorecen a responsabilidade, a autonomía e a solidariedade.
Ningún comentario:
Publicar un comentario