BENVID@S!!

CLUB DE LECTURA

 

O SAMAÍN NA AULA DE 6⁰ E.I.

Hoxe gozamos co noso tradicional obradoiro de caveiras ou calacús.

Iniciamos a sesión cun broche agasallo de cabaciña que cada crianza elaborou a semana anterior.
Baleirámos as cabazas, tallámolas e colocámoslle unha candea acesa no seu interior.

Xogamos co medo acompañados/as da cantiga "Eu son a pantasma do Samaín...". 

Colocamos as caveiras na entrada e despedímonos das nosas familias coa cantiga aprendida dos celtas.
 Agradecemos a todas aquelas que puidestes compartir este tempiño connosco na escola e agradecemos de igual maneira a aquelas familias que aportastes as cabazas á aula.
 

Deixamos unha pequena mostra da xornada de hoxe, xa que o resto das fotografías irán na entrada do Samáin do venres! 

 

CONCERTO DIDÁCTICO

 O venres, 16 de outubro, os cursos de 3º a 6º de primaria fomos ao Auditorio de Galicia.
Asistimos a un concerto da Banda Municipal de Santiago que tocou pezas de moitos compositores de diferentes épocas: Mozart, Vivaldi, Beethoven, Ravel… A música estaba acompañada pola representación cómica de actores, que nos fixeron rir moito. Estivo xenial!

Noticia redactada polo alumnado de 3ºB

 

CINE DE SAMAÍN EN INFANTIL

 

🎃 CINE DE SAMAÍN👻

Hoxe demos comezo ás sesións de cine de Samaín co alumnado de Primaria. Berros dende a pantalla, música de tensión e moitas risas acompañaron esta primeira xornada chea de emocións e diversión! 🍿🦇

📅 Non esquezades consultar o cartel para saber que días terán lugar as próximas sesións. Aínda quedan moitas historias terroríficas por descubrir! 🎬💀

 

 

O alumnado de 4º de Educación Primaria visita as dependencias da Policía Local

O venres día 2 de outubro o alumnado de 4º de Educación Primaria recibimos a visita da Policía Local de Santiago de Compostela nas nosas aulas.

A actividade tivo dúas partes. A primeira, foi unha charla teórica para informarnos de como debiamos comportarnos como peóns polas rúas. A segunda parte, máis práctica tivo lugar polas rúas de Compostela, onde Roberto, o policía local, ía dándonos indicacións de como ir pola rúa, como pasar por riba dos pasos de peóns, como pasar por diante dos garaxes...

Sen embargo, o mellor estaba por vir. Chegamos á comisaría da policía. O que máis nos chamou a atención foron as celas para aquelas persoas que foran detidas. Eran moi pequenas e a verdade é que nos causaron impresión xa que nunca viramos como eran.

A visita da Policía Local gustounos moito e ensinounos moitas cousas que non coñeciamos como peóns. 

Noticia redactada polo alumnado de 4ºA 

 

📚 A maleta viaxeira chega á aula de inglés!

O alumnado desfruta dos libros da Maleta Viaxeira de Bibliotecas Escolares de Galicia, descubrindo novas historias e gozando da lectura tamén na aula de inglés. Unha oportunidade para aprender, imaxinar e viaxar a través dos libros! 🌍📖

 

📚 O alumnado biblioaxudante de 5º visita a Biblioteca Pública Ánxel Casal!

 Hoxe, o novo equipo de biblioaxudantes de 5º de Primaria continuou a súa formación cunha visita moi especial á Biblioteca Pública Ánxel Casal de Santiago de Compostela. Alí, da man da técnica que nos acompañou, tivemos a oportunidade de coñecer as diferentes plantas e descubrir todo o que agocha esta gran biblioteca.

 

Comezamos na planta cero, onde puidemos contemplar unha exposición de monicreques do mundo, e continuamos o percorrido ata a cuarta planta. Pero, sen dúbida, onde máis tempo pasamos foi na primeira, a planta infantil! 👧📖

 

Alí descubrimos que a súa organización é moi semellante á da nosa biblioteca escolar, só que en grande! As etiquetas dos libros, as cores, os números… Todo nos resultaba familiar. Ademais, aprendemos a utilizar os ordenadores do catálogo para localizar os libros nos andeis e coñecemos como funciona o servizo de préstamo e devolución. E algúns aínda sacaron un ratiño de lectura...

E non fomos só para aprender! Tamén deixamos expostas as nosas recomendacións lectoras para que outras persoas usuarias da biblioteca poidan coñecelas e animarse a descubrir novas lecturas. 💚

 

E, como non podía ser doutro xeito, antes de marchar, as lectoras e os lectores máis voraces do grupo aproveitaron para levar algúns libriños para casa. Porque unha visita á biblioteca sempre é unha boa oportunidade para atopar novas historias!

Grazas á Biblioteca Pública Ánxel Casal e á Moni que nos acompañou por recibirnos e axudarnos a seguir medrando como biblioaxudantes. Seguimos aprendendo para coidar, dinamizar e encher de vida a nosa biblioteca escolar! 📚✨

 

Voces da Escola: unha conversa con Delfina Bañobre

O equipo da sección de entrevistas da revista escolar NASS achégase aos micrófonos de Radio Vagalume para conversar con Delfina Bañobre, antiga mestra e directora do CEIP Apóstolo Santiago.

Esta entrevista enmárcase no noso novo proxecto documental integrado, «Erase unha vez a nosa escola», co que queremos recuperar a memoria do centro, coñecer a súa historia e descubrir como foi cambiando ao longo dos anos.

A través das lembranzas e experiencias de Delfina, achegámonos a outras épocas da vida escolar e á pegada que deixaron nela as persoas que formaron parte da nosa comunidade educativa.

Unha nova entrega de «Voces da Escola», o programa de Radio Vagalume no que as voces de onte nos axudan a comprender mellor a escola de hoxe.

 

A MOCHILA VIAXEIRA EN 6⁰ EI

Que ilusión nos fixo descubrir os libriños e o xogo da mochila viaxeira. 

Atopamos a moitos amiguiños e amiguiñas doutros cursos e lemos algunha das súas mensaxes.
Comeza a aventura con Cloe! 

Desfrútaa!

🎙️ Comezan os programas de Voces da Escola en Radio Vagalume!

Abrimos os micrófonos de Radio Vagalume para dar voz á memoria do noso centro. 📻

Dentro do PDI deste curso "Érase unha vez a nosa escola", dedicado á historia do CEIP Apóstolo Santiago, nace ** Voces da Escola **, un espazo no que escoitaremos as historias, lembranzas e experiencias das persoas que, nalgún momento das súas vidas, formaron parte da nosa comunidade educativa.

O alumnado converterase en xornalista para entrevistar antigas alumnas e alumnos, profesorado e outras persoas vinculadas ao centro, recuperando así unha parte da nosa historia colectiva.

Porque detrás de cada fotografía, de cada lembranza e de cada voz hai un anaco da historia que nos axuda a comprender quen somos.

Voces da Escola: o pasado fala, o presente escoita e o futuro continúa.

 

 

COÑECE O MEU CLUB

Esta semana recibimos a visita de Quique, do Club de Balonmán Ribadosar, que realizou actividades con todo o alumnado de Primaria para achegarnos a este deporte e descubrir como se xoga.

Ademais, quen teña curiosidade por seguir coñecéndoo poderá asistir a un adestramento con el e vivir a experiencia de primeira man!

📅 Horarios dos adestramentos:

• De 1º a 3º de Primaria: martes e xoves ás 18:30 h.

• De 4º a 6º de Primaria: luns ás 18:30 h e mércores ás 19:00 h.

Esta actividade enmárcase no programa «Coñece o meu club», dentro do Plan de Vida Activa e Deportiva (PVAD) do Plan Proxecta, co obxectivo de achegar o deporte ao alumnado e fomentar hábitos de vida activa e saudable.

Moitas grazas a Quique e ao Club de Balonmán Ribadosar por compartir con nós esta experiencia! 

 

MOCHILAS VIAXEIRAS

VEÑA QUE XA AS TEMOS LISTAS!!!

 EN BREVES SAEN RODAR ESTAS MOCHILAS VIAXEIRAS E A COÑECER FOGARES CADA SEMANA!

 

 

 

MILLA DIARIA- PLAN DE VIDA ACTIVA E DEPORTIVA

 A MILLA DIARIA” é unha modalidade dentro do PVAD (proxecto de vida activa e deportiva) do Plan Proxecta, no que participa o centro,  que pretende fomentar entre as rapazas e rapaces un estilo de vida saudable, aumentando o tempo que dedican á actividade física. Consiste en marcar no patio dos colexios ou arredores, un percorrido dunha milla de lonxitude (1600 metros) e facelo en calquera momento da xornada escolar de luns a venres.  Preténdese loitar contra o sedentarismo e a obesidade, pero tamén buscar os beneficios que a actividade física pode aportar para mellorar a atención, a concentración e axudar na resolución de conflitos mediante descansos activos durante a xornada escolar.

Este curso, a Milla Diaria estará relacionada co proxecto Érase unha vez a nosa escola. Comezaremos no ano 1955, con 0 quilómetros percorridos, e cada 5 quilómetros avanzaremos un ano na liña do tempo da historia da nosa escola.

                                         5 KM  =  1 ANO

 
Cada aula irá rexistrando os metros que percorre diariamente, xa sexa nos descansos activos, nos paseos en grupo, nas saídas ou noutras actividades. Todos os metros contan e todas as persoas suman! Se participa toda a clase, sumaremos o percorrido de todas e todos; se só participan 5 persoas, tamén contaremos os metros percorridos por esas 5 persoas.

Iredes acumulando os metros ata chegar aos 5.000 metros (5 km). Nese momento, avanzaremos un ano na nosa viaxe pola historia.

É recomendable manter actualizada a tarxeta da porta, xa que a mestra de Educación Física irá recollendo os datos para facer avanzar a Lingoreta pola liña do tempo xeral que estará no espazo do proxecto, no vestíbulo. Ademais, Lingoreta irá cambiando de aspecto segundo a década na que se atope.

 

Conseguirá algunha aula chegar ata o 2027? 
E entre toda a escola?

🚶🌍Nas portas de cada clase teremos un cartaz coma este, que deberedes ir cubrindo e modificando.