BENVID@S!!

Un curso construíndo Somos Barrio

 Chegamos ao final do noso proxecto e, ao mirar o espazo do vestíbulo que lle fomos dedicando ao longo do curso, decatámonos de todo o camiño percorrido. O que comezou cun panel case baleiro foi medrando pouco a pouco, enchéndose de investigacións, fotografías, mapas, entrevistas, debuxos, reflexións e moitas historias. Igual que nós, tamén el foi aprendendo e medrando.

Premendo na lapela de "Somo Barrio", podedes ver calquera das entradas moito máis ampliada.

 Comezamos investigando que rúas pertencían a cada barrio e axiña descubrimos que ser de San Pedro ou da Almáciga é moito máis ca vivir dentro duns límites marcados nun plano; é un sentimento de pertenza, unha maneira de vivir e de compartir un mesmo espazo.

 Saímos ás rúas para preguntar á veciñanza que opinaba sobre o bo trato nos nosos barrios. Observamos, escoitamos e reflexionamos sobre como convivimos e como podemos facer dos nosos espazos lugares cada vez máis amables para todas as persoas.

 

Tamén percorremos as rúas con ollos críticos, detectando barreiras arquitectónicas e propoñendo solucións para facer o barrio máis accesible. Aprendemos que pequenos cambios poden mellorar moito a vida das persoas.

 

Inspirados por Rosalía de Castro, detivémonos a observar algúns recunchos do barrio, debuxamos as súas siluetas mentres recitabamos os seus versos e descubrimos unha nova forma de unir poesía e imaxe a través dos caligramas. 

 

As nosas investigacións convertéronse en lapbooks cheos de información, curiosidades e descubrimentos. Grazas ás entrevistas realizadas a moitas persoas da nosa contorna, fomos recompilando historias que nos permitiron coñecer mellor o pasado e o presente dos barrios. E, por un tempo, tamén nos transformamos en xornalistas, redactando noticias... ou talvez "vellas", porque ás veces as novas máis interesantes son as que nos falan do que xa pasou.

 

A través de Radio Vagalume demos vida ás Voces do Barrio, un espazo que nos permitiu coñecer persoas extraordinarias que compartiron connosco os seus recordos, experiencias e vivencias. Grazas a elas comprendemos que a memoria dun barrio tamén se conserva nas palabras de quen o viviu e o segue construíndo cada día. 

 Pouco a pouco fomos creando un pequeno mapa coas nosas Xeografías do Barrio, sinalando aqueles lugares que consideramos especiais, e confeccionando unha liña do tempo que nos axudou a comprender como evolucionaron San Pedro e a Almáciga ao longo dos anos.

E tamén camiñamos. Camiñamos moito. Percorremos as nosas rúas acompañando e orientando aos peregrinos, axudándoos a continuar o seu Camiño cara ás súas cidades e países de orixe. Porque vivir nun barrio polo que pasa o Camiño de Santiago tamén significa formar parte dunha historia que se escribe cada día con milleiros de pasos...aínda que moitos deles molesten un pouquiño cando cruzan polas nosas casas.

 

Como lembranza de todo este percorrido, a biblioteca conservará un novo recurso creado polo alumnado: o Xogo de Lingoreta: Somos Barrio (un xogo da Oca, de andar pola nosa casa...) Un taboleiro para seguir xogando, aprendendo e percorrendo os nosos barrios unha e outra vez, porque as mellores historias nunca rematan... simplemente continúan cada vez que alguén decide volver a camiñar por elas.

 

Grazas a todas as persoas que formastes parte desta aventura. Seguiremos facendo barrio, porque Somos Barrio. Pero.... que terá pensado Lingoreta para o curso que ven???

Feliz verán a todas!!! 

Xa está aquí o Xogo da Oca de Somos Barrio!

 Temos o gusto de presentarvos algo que se estivo cocendo entre a biblioteca e a aula de 5º de Primaria durante os últimos días de clase e que, ata agora, permanecía gardado como un pequeno segredo...

O Xogo da Lingoreta de Somos Barrio! (unha adaptación do tradicional xogo da Oca...)

Ao longo do curso fomos descubrindo a historia, os espazos, as persoas e as curiosidades de San Pedro e da Almáciga. Agora, toda esa aprendizaxe convértese nun xogo no que cada casiña é unha oportunidade para lembrar, descubrir e seguir aprendendo sobre os nosos barrios.

Este taboleiro recolle moitos dos lugares, personaxes e elementos que fomos coñecendo a través das investigacións, das entrevistas, dos paseos e das actividades do proxecto. Unha maneira divertida de poñer a proba todo o aprendido e de compartir con outras persoas o patrimonio e a memoria do lugar no que vivimos. Coñeceredes os lugares que saen en cada unha das casiñas?? Que lugares ou momentos nos axudarásn a volver a tirar? E cales farán que perdamos algunha quenda?... A xeaedaría, a escola, o Magóstolo, o bolardo, os peregrinos, a chuvia....etc... un montón de lembranzas que recollemos neste xogo de Lingoreta, e que algunhas seguro que vos sacan algún sorriso!

Noraboa as compañeiras de 5º polo diseño das imaxes! 

Agardamos que gocedes desta nova creación tanto como nós gozamos deseñándoa. Porque aprender tamén pode ser xogar... e non hai mellor partida que a que nos leva a descubrir o noso barrio.

Preparadas e preparados? Tirade o dado... 

DE LINGORETA A LINGORETA....E TIRO PORQUE ME PETA!

 

XEOGRAFÍAS DO BARRIO. Seguimos descubrindo o noso barrio

Neste terceiro trimestre o tempo non nos deu para rematar todo o traballo que tiñamos previsto. O noso obxectivo era investigar diferentes lugares do barrio, localizalos nun plano e elaborar unha pequena ficha con información sobre cada un deles: a súa historia, os usos que tiveron ao longo do tempo, como foron cambiando e por que son importantes hoxe.

Aínda que non conseguimos recoller moitos resultados en papel, o traballo de investigación estivo moi presente nas aulas. O alumnado buscou información, compartiu descubrimentos e coñeceu un pouco mellor o patrimonio e a historia de San Pedro e da Almáciga.

Esta será un traballo que cada quen seguirá facendo por si mesmo según vaia descubrindo cousas novas... xa que o proxecto do ano que ven...aínda nos pode dar tamén información para seguir descubrindo os nosos barrios, porque para coidar o lugar no que vivimos, primeiro hai que coñecelo. 

VOCES DO BARRIO

Grazas por poñerlle voz ao noso barrio

Co remate deste curso queremos expresar o noso máis sincero agradecemento a todas as persoas que se achegaron á nosa escola para compartir un anaquiño da súa vida e da historia dos nosos barrios.

A través de Radio Vagalume e da sección Voces do Barrio, tivemos a oportunidade de escoitar lembranzas, experiencias, profesións, costumes e vivencias que nos axudaron a coñecer moito mellor San Pedro e a Almáciga. Cada entrevista foi unha nova aprendizaxe e unha oportunidade para descubrir que a verdadeira historia dos barrios tamén se escribe coas voces das persoas que os habitan e os fan medrar cada día.

Grazas pola vosa xenerosidade, polo voso tempo e por abrirnos as portas dos vosos recordos. Sen a vosa colaboración, este proxecto non tería sido posible.

Agardamos volver atoparnos o vindeiro curso para seguir enchendo Radio Vagalume de novas historias e continuar descubrindo, entre todas e todos, a riqueza do noso barrio.

Moitas grazas por formar parte de Voces do Barrio!

 

CONTA COMIGO

 Pechamos o espazo "Conta comigo" coa visita de Faia, a nai de Maruxa, que nos agasallou coa súa fermosísima voz, ensinounos como crear música dunha maneira "máxica" e mostrounos unha coreografía da canción "Lomo de salmón" do grupo De vacas.
Grazas Faia, foi fantástico terte de novo connosco.  

 

A LIÑA DO TEMPO

Ao longo de todo o curso fomos descubrindo a historia dos barrios de San Pedro e da Almáciga a través das entrevistas, das charlas, dos paseos, das investigacións nas aulas e das diferentes actividades do proxecto.

Pouco a pouco fomos recompilando datas, acontecementos e curiosidades que nos permitiron construír a nosa propia liña do tempo. Cada novo descubrimento converteuse nunha peza máis deste gran crebacabezas que nos axuda a comprender como foron evolucionando os nosos barrios ao longo dos séculos.

A nosa liña do tempo foi medrando a medida que medraba tamén o noso proxecto. Nela quedaron recollidos feitos históricos, cambios urbanísticos, acontecementos culturais e outros momentos importantes que forman parte da memoria de San Pedro e da Almáciga.

Este é un traballo vivo, que continuará medrando con novas investigacións e novos descubrimentos, porque a historia do noso barrio segue escribíndose cada día.