Cartas que crean conexións 💌📚

O alumnado de 5º e 6º de primaria está a participar nunha fermosa iniciativa proposta pola comisión de Lingua da ANPA, en colaboración co CEIP Raíña Fabiola.

Dende o outro centro comezaron unha correspondencia moi especial: cartas en papel dirixidas a unha persoa descoñecida da nosa escola. A súa chegada foi recibida con moita ilusión, curiosidade e ganas de descubrir quen se agochaba detrás de cada mensaxe.

Despois de lelas con atención, puxémonos mans á obra para responder aos nosos “amigos e amigas descoñecidos/as”. As cartas xa están listas para enviar, cargadas de palabras, emocións e moitas ganas de seguir compartindo.

Agora agardamos con ilusión poder culminar esta experiencia cunha xornada de convivencia na que, por fin, poidamos poñerlle cara a quen está ao outro lado das cartas.

Unha actividade que nos lembra o valor da escrita, da espera… e da conexión entre persoas.